Libros que veñen e van

Seguimos cos nosos tempos de lectura, nesta ocasión, nas aulas de Lingua castelá e Lingua galega.

Recomendacións lectoras polo Día da visibilidade trans (31 de marzo)

Aquí vos quedan algunhas recomendacións lectoras co gallo do Día da visibilidade trans, que se celebra cada 31 de marzo. Pola diversidade!

Troca de libros no Salón do libro infantil e xuvenil de Pontevedra 2025

Queremos agradecer o labor da nosa ANPA na preparación do espazo e a xestión da Troca de libros 2025, organizada polo IES Torrente Ballester en colaboración co Salón e que se celebrou este domingo 30 de marzo. Grazas mil!

Encontro de Clubs de Lectura de Pontevedra

 E seguimos no Salón do Libro! 

Esta mañá, no Salón do Libro de Pontevedra,  xuntámonos os Clubs de Lectura de Pontevedra, ademais doutros ies dos arredores, para falar de nós e de libros (como non!!). Foi unha mañá ben bonita, chea de historias e moita diversión, que tamén nola quixo achegar o narrador Dani Blanco coa súa obra "Marmuraban as miñas veciñas". Ao final desta convivencia, chegou o esperado concurso Le e Gaña co que recibimos varios lotes de libros como premio.

Nora e Diego foron os encargados de presentarnos ao resto de escolas, falando dos clubs e dalgúns dos libros que cada un leu, coas súas recomendacións incluídas. E Nico é o responsábel das fotos tan profesionais que podedes ver na nosa galería sobre o musical. Felicidades e agradecementos a todas e todos vós!

Tras un breve descansiño para merendar, puidemos asistir ao musical Les miseràbles, que escenificou o IES Illa de Ons. Unha posta en escena magnfífica e cun grande traballo detrás. Parabéns a esta escola!

Podedes ver a mostra do ben que o pasamos premendo aquí. 

Até o próximo encontro, amiguiñas e amiguiños! 👋👋

Preparando o encontro con Iñaki Zubizarreta

Algo está a pasar no IES que andan as aulas revolucionadas. O próximo 22 de abril teremos a visita de Iñaki Zubizarreta Tellería, protagonista de Subnormal. Una historia de acoso escolar (Dibbuks). En todas as clases (de 1º ESO a 1º Bacharelato) estamos a ler a obra e preparando o encontro. Ademáis, o alumnado de 2º ESO visitará o vindeiro 4 de abril o Salón do libro de Pontevedra para ter unha charla cos ilustradores desta BD (Fernando Llor e Miguel Porto). Intentaremos conseguir que, entre tod@s, poidamos facer do noso centro un lugar mellor!

Radio Xunqueira: un fervedoiro

Na mañá de hoxe a radio da Biblioteca foi un fervedoiro. 

Empezou a traballar o alumnado de 4º ESO que, dirixido pola profesora María Bravo do Departamento de inglés, está a ensaiar os seus podcast en lingua inglesa, desenvolvendo así tanto as súas destrezas na escrita como na oralidade. 

Despois foi o turno do alumnado de 2º ESO, que participará, coordinado polo Departamento de Lingua castelá, no concurso de Radio Pontevedra - Cadena Ser José Hermida, cun podcast no que decidiron imitar a linguaxe e seccións radiofónicas da radio da nosa cidade traballando diversos xéneros periodísticos (noticias, entrevistas e crónicas) e a edición de audio.

Charlas sobre Animais extraordinarios na biblioteca: Xulio Gutiérrez

Na mañá de hoxe o alumnado do centro tivo a oportunidade de escoitar, un ano máis, a Xulio Gutiérrez, autor da colección Animais extraordinarios publicada por Kalandraka e grazas ao Departamento de Bioloxía e Xeoloxía. Xulio falounos sobre curiosidades zoolóxicas e tamén sobre o proceso de documentación e ilustración dos libros, realizada por Nicolás Fernández. Estes libros, Ollos, Bocas, Ocultos, Nacer, Construtores e Viaxeiros, que xa se convertiron en obras imprescindibles da divulgación científica en galego, están dispoñibles na nosa biblioteca. É sempre un pracer escoitarte, Xulio!