Relatórios en podcasts - Club de lectura Português

 

Depois de terminarmos a lectura de A Viúva e o Papagaio, de Virginia Woolf, e de A Fada Oriana, de Sophia de Mello Breyner Andresen, chegou o momento de compartir impresións a través da gravación de podcasts.

Organizados en pequenos grupos, as alumnas e os alumnos conversaron sobre as historias, compartiron impresións e reflexionaron sobre os personaxes, os valores presentes nas obras e as mensaxes que lles transmitiron. Ao longo da gravación, intercambiaron opinións, formularon preguntas entre eles e defenderon os seus puntos de vista nun ambiente participativo, colaborativo e moi enriquecedor.

A actividade desenvolveuse con moito entusiasmo e permitiulles pór en práctica non só a comprensión das lecturas, senón tamén a expresión oral en lingua portuguesa, a capacidade de argumentación e a escoita activa. Cada podcast converteuse nun espazo de diálogo no que a lectura serviu como punto de partida para compartir ideas, emocións e reflexións.

Foi unha experiencia moi enriquecedora, que demostra, unha vez máis, que os libros son unha excelente oportunidade para aprender, comunicarse e gozar da lectura en compañía. Parabéns a todo o alumnado pola súa implicación, creatividade e excelente traballo!

Visita ao Salón do Libro 2026 de Pontevedra

 

Esta semana tivemos a oportunidade de participar en distintas actividades organizadas polo Salón do Libro de Pontevedra, un espazo de encontro arredor dos libros, a creación e a cultura.

O luns, 16 de marzo, unha representación dos diferentes clubs de lectura asistiu á xornada de convivencia dos clubs de lectura da provincia. Foi unha ocasión magnífica para coñecer alumnado doutros centros, compartir experiencias e descubrir novas propostas lectoras. Cada grupo presentou o seu club, explicou como desenvolve as súas actividades e recomendou algunhas das lecturas que máis o marcaron ao longo do curso. 

A xornada completouse cun agasallo moi especial por parte da organización do Salón: unha charla-concerto do cantante Mondra, que conquistou aos asistentes coa súa proximidade, as súas recomendacións lectoras e unha proposta musical que mestura tradición e modernidade. Foi un peche perfecto para un día cheo de lecturas, convivencia e cultura.

 

Dous días despois, o mércores 18 de marzo, foi a quenda do alumnado do club de banda deseñada e manga, que visitou no Pazo da
Cultura a exposición dedicada á obra Idol!, creada por Alba Chan e Ene, gañadoras do V Premio O Garaxe Hermético de Banda Deseñada (2023).

A exposición permitiunos achegarnos ao proceso creativo das autoras, descubrir os orixinais da obra e coñecer de preto o traballo que hai detrás da creación dunha banda deseñada. Foi unha experiencia moi enriquecedora para todas as afeccionadas/os ao manga e á novela gráfica, que puideron apreciar con outros ollos o valor artístico e narrativo deste medio.

 

 

Virtudes (e misterios). Encontro virtual co autor Xesús Fraga.

O club de lectura de adultos tivo o privilexio de manter un encontro virtual con Xesús Fraga para conversar sobre Virtudes (e misterios), unha novela que emociona pola súa delicadeza, a súa fondura e a fermosa maneira de contar unha historia familiar que se converte tamén na historia de tantas persoas emigrantes.

Ao longo da conversa, o autor explicou como naceu esta obra inspirada na vida da súa avoa, Virtudes, e como foi reconstruíndo a memoria familiar a partir de recordos, documentos e investigación. Cunha narrativa coidada e perfectamente enfiada, a novela mergúllanos de cheo na dura vida da protagonista, marcada pola emigración, o esforzo, os sacrificios e a loita constante por saír adiante sen perder nunca a dignidade nin a esperanza.

Xesús Fraga compartiu connosco algunhas das anécdotas que se agochan detrás da escrita do libro, revelando detalles do proceso de documentación e das emocións que acompañaron a recuperación desta historia familiar. As súas explicacións permitíronnos comprender mellor a dimensión humana da obra e valorar aínda máis a importancia da memoria como patrimonio colectivo.

O encontro desenvolveuse nun ambiente moi próximo e cordial. Agradecemos a Xesús a súa dispoñibilidade e a xenerosidade coa que compartiu as súas vivencias e o seu proceso creativo. 

 

 

 

Encontro con Arantza Portabales: descubrindo os segredos de "Asasinato na casa rosa"

 

Despois da lectura de Asasinato na casa rosa, o club de lectura de Narrativa Galega celebrou no mes de novembro unha primeira reunión na que compartimos impresións, analizamos a trama e debatemos sobre os personaxes, os seus conflitos e o sorprendente desenlace da novela.

Hoxe tivemos a fortuna de recibir a visita da súa autora, Arantza Portabales, nun encontro que puxo o broche de ouro a esta lectura.

A presenza da escritora permitiunos resolver de primeira man moitas das cuestións que xurdiran durante o noso primeiro debate. Ao longo da conversa, Arantza explicou como naceu a historia, o proceso de creación dos personaxes e as decisións narrativas que foi tomando para manter a intriga ata o final. Tamén compartiu connosco curiosidades sobre a escritura da novela e respondeu con gran proximidade a todas as preguntas formuladas polas persoas asistentes.

Entre as moitas curiosidades que compartiu connosco, revelou o motivo polo que decidiu chamar Loeiro ao lugar onde transcorre boa parte da acción, en lugar de empregar o nome real de Loira. Tamén nos descubriu que algúns dos espazos que aparecen na obra son lugares creados pola súa imaxinación ou combinacións de escenarios reais, o que explica que durante a nosa primeira reunión non fósemos quen de situalos con exactitude.

Este diálogo permitiunos volver sobre a novela con outra mirada e apreciar mellor os seus matices, os xogos narrativos e a coidada construción da historia.

Agradecemos a Arantza Portabales a súa cercanía, a xenerosidade coas súas explicacións e a disposición para responder a todas as preguntas formuladas polos membros do club. 

 

 

Falamos con Xesús Constela da súa novela "O peso do cerebro"

 

O noso club de lectura tivo a oportunidade de vivir unha experiencia moi especial coa visita de Xesús Constela, autor da novela O peso do cerebro, obra que previamente lemos.

Durante o encontro, o escritor e ex-profesor do noso instituto achegounos ao proceso de creación da novela, explicándonos como xurdiu a historia e como foi construíndo os seus personaxes e escenarios. Foi especialmente interesante descubrir que moitos dos episodios e situacións que aparecen no libro están inspirados en vivencias reais, así como coñecer que algúns dos personaxes teñen a súa orixe en persoas próximas ao autor e á súa propia familia.

Xesús Constela tamén nos falou da importancia do Ferrol dos estaleiros como escenario da novela. A cidade que o viu nacer, a súa historia industrial, o ambiente obreiro e a pegada da construción naval convértense nun elemento esencial da narración, dotándoa dunha grande autenticidade e forza.

Os asistentes tivemos ocasión de formular preguntas, compartir as nosas impresións sobre a lectura e dialogar co autor sobre diferentes aspectos da obra. Foi un encontro moi enriquecedor que nos permitiu comprender mellor a novela e descubrir todo o que hai detrás das súas páxinas.

Queremos agradecer a Xesús Constela a súa proximidade, a xenerosidade coas súas explicacións e o tempo compartido connosco. Sen dúbida, foi unha experiencia inesquecíbel que reforzou o noso gusto pola lectura e nos permitiu achegarnos dun xeito máis directo ao proceso creativo.

 

 

 

 

   

Conversa ao redor de "Asasinato na casa rosa", de Arantza Portabales

 

O noso club de lectura celebrou o primeiro encontro deste curso académico arredor da novela Asasinato na casa rosa, de Arantza Portabales.

Esta sesión tivo, ademais, un significado especial, xa que neste segundo ano de creación do club incorporáronse por primeira vez as nais ao grupo de lectura. A súa participación contribuíu a facer aínda máis enriquecedor o diálogo e a compartir novas perspectivas sobre a obra.

Ao longo do encontro, os participantes falamos e opinamos sobre a novela, comentando os aspectos que máis nos chamaron a atención, a construción da trama, os personaxes e o desenvolvemento da investigación. Tamén respondemos ás cuestións propostas, que nos permitiron afondar nos temas tratados na obra e favorecer un interesante intercambio de impresións.

Foi unha sesión moi participativa, na que quedou patente que cada lector e lectora interpreta a historia desde unha óptica diferente, enriquecendo así a experiencia compartida da lectura.

Agradecemos a asistencia e a implicación de todas as persoas participantes e agardamos con ilusión os vindeiros encontros do club de lectura.

 

 

Conversa con Miriam Couceiro

Tras a lectura de De dióxido e diamantes, de Miriam Couceiro Castro, o club de lectura do profesorado mantivo unha conversa coa autora ao redor do seu libro. Foi unha tarde agradábel onde a autora respondeu con detalle a cada unha das cuestións e determinadas opinións das súas lectoras e lectores. 

Grazas a Miriam pola súa amabilidade e tempo, e á editorial Galaxia pola colaboración. 

Convivencia clubs de lectura

Para dar unha despedida aos diferentes clubs de lectura deste curso académico 2024/2025, organizouse, na biblioteca do noso centro, un almorzo de convivencia para todas as persoas participantes, tanto alumnado como profesorado. 

 Agradecemos a todas e a todos a súa implicación e entusiasmo nas lecturas recomendadas e traballadas ao longo do curso. 

FELIZ VERÁN, CON LECTURAS INCLUÍDAS! 💙🌞

Contador de histórias em português

 António Fontinha é un contador de historias lisboeta que chegou ao noso centro para narrar contos tradicionais ao alumnado de português. E claro!, falou en portugués.

 Previamente ás historias, introduciunos no significado dos contos; como os pobos compartimos as mesmas narracións que xa foran contadas séculos atrás, transmitidas oralmente e de xeración en xeración. Duns lugares a outros poden verse modificadas debido a esa transmisión, de boca en boca.

Despois disto, deu comezo aos contos, contados de maneira case teatralizados, onde a voz xogaba moito; de tan metidos de cheo que estabamos na narración, facíanos saltar do asento por momentos. Pasamos unha sesión moi divertida e entretida.

 

 

ANTÓNIO FONTINHA