Visita ao Salón do Libro 2026 de Pontevedra

 

Esta semana tivemos a oportunidade de participar en distintas actividades organizadas polo Salón do Libro de Pontevedra, un espazo de encontro arredor dos libros, a creación e a cultura.

O luns, 16 de marzo, unha representación dos diferentes clubs de lectura asistiu á xornada de convivencia dos clubs de lectura da provincia. Foi unha ocasión magnífica para coñecer alumnado doutros centros, compartir experiencias e descubrir novas propostas lectoras. Cada grupo presentou o seu club, explicou como desenvolve as súas actividades e recomendou algunhas das lecturas que máis o marcaron ao longo do curso. 

A xornada completouse cun agasallo moi especial por parte da organización do Salón: unha charla-concerto do cantante Mondra, que conquistou aos asistentes coa súa proximidade, as súas recomendacións lectoras e unha proposta musical que mestura tradición e modernidade. Foi un peche perfecto para un día cheo de lecturas, convivencia e cultura.

 

Dous días despois, o mércores 18 de marzo, foi a quenda do alumnado do club de banda deseñada e manga, que visitou no Pazo da
Cultura a exposición dedicada á obra Idol!, creada por Alba Chan e Ene, gañadoras do V Premio O Garaxe Hermético de Banda Deseñada (2023).

A exposición permitiunos achegarnos ao proceso creativo das autoras, descubrir os orixinais da obra e coñecer de preto o traballo que hai detrás da creación dunha banda deseñada. Foi unha experiencia moi enriquecedora para todas as afeccionadas/os ao manga e á novela gráfica, que puideron apreciar con outros ollos o valor artístico e narrativo deste medio.

 

 

Encontro con Miguel Porto

 Na mañá de hoxe o alumnado de 2 ESO asistiu, dentro da programación do Salón do libro, a un encontro con Miguel Porto, ilustrador de Subnormal e profe de BD no Garaxe hermético. Contounos o proceso de xestación da obra e do seu papel como ilustrador dunha historia real tan intensa, e explicounos o porqué dos planos, das cores, da disposición das viñetas... Aprendemos un montón sobre lectura visual! E o mellor de todo, como tod@s leramos o libro no IES, encantounos coñecer de primeira man o traballo creativo que hai detrás dunha BD. Grazas a Miguel pola súa cercanía e ao Salón por prepararnos actividades tan molonas!

Troca de libros no Salón do libro infantil e xuvenil de Pontevedra 2025

Queremos agradecer o labor da nosa ANPA na preparación do espazo e a xestión da Troca de libros 2025, organizada polo IES Torrente Ballester en colaboración co Salón e que se celebrou este domingo 30 de marzo. Grazas mil!

Encontro de Clubs de Lectura de Pontevedra

 E seguimos no Salón do Libro! 

Esta mañá, no Salón do Libro de Pontevedra,  xuntámonos os Clubs de Lectura de Pontevedra, ademais doutros ies dos arredores, para falar de nós e de libros (como non!!). Foi unha mañá ben bonita, chea de historias e moita diversión, que tamén nola quixo achegar o narrador Dani Blanco coa súa obra "Marmuraban as miñas veciñas". Ao final desta convivencia, chegou o esperado concurso Le e Gaña co que recibimos varios lotes de libros como premio.

Nora e Diego foron os encargados de presentarnos ao resto de escolas, falando dos clubs e dalgúns dos libros que cada un leu, coas súas recomendacións incluídas. E Nico é o responsábel das fotos tan profesionais que podedes ver na nosa galería sobre o musical. Felicidades e agradecementos a todas e todos vós!

Tras un breve descansiño para merendar, puidemos asistir ao musical Les miseràbles, que escenificou o IES Illa de Ons. Unha posta en escena magnfífica e cun grande traballo detrás. Parabéns a esta escola!

Podedes ver a mostra do ben que o pasamos premendo aquí. 

Até o próximo encontro, amiguiñas e amiguiños! 👋👋

Salón do libro 2025

Xa comezou o Salón do Libro, en Pontevedra. Nesta nova edición, o país convidado é Francia, achegándonos principalmente ao mundo do cinema e dos libros. 

E entre as propostas presentadas, coñecer á autora Consuelo Vercher (francesa hoxe galega) a través dunha conversa ao redor do seu libro Charlotte. E quen tivo o pracer de coñecela e compartir unha horas matutinas con ela foi o grupo de francés de 2ºBacharaleto, quen saíu contento e sorprendido pola cercanía da escritora.

Grazas ao Salón e, en especial, a Consuelo Vercher.

 

Dálle unha nova vida aos libros usados!

Participa na Troca de libros do Salón do libro de Pontevedra, organizada polo IES Torrente Ballester, o domingo 30 de marzo no Pazo da cultura. Trae un ou máis libros en bo estado á biblioteca do IES. Por cada libro que traias darémosche un vale para cambiar na Troca por outro do teu interese. Non perdas a oportunidade de darlle unha nova vida aos libros usados!

Selección de libros sobre a Maxia

Co gallo da celebración do XXV Salón do Libro Infantil e Xuvenil de Pontevedra, que ten como lema este ano a Maxia, a biblioteca do IES Xunqueira preparou unha selección de libros sobre esta temática. Agardamos que vos guste!