Traballando na biblio coas actividades do proxecto do PFPP

Estes últimos días andivemos a traballar nas propostas deseñadas no PFPP da Biblioteca sobre romper estereotipos sobre as persoas migrantes e aquí vos quedan algunhas imaxes!

Os nosos podcast de 2 ESO

Nas aulas de 2 ESO traballamos arreo neste curso para elaborar podcast empregando o espazo de radio da biblio. Tras decidir os temas, elaborar os guións e contactar cos entrevistados, aquí temos por fin os resultados:

Podcast entrevista C.P. A Lama (2º ESO)

 

Podcast entrevista drogas e adolescencia (2º ESO)

Podcast entrevista mocidade e ultradereita (2º ESO)

Charlas sobre desinformación

Os xornalistas Luz Espiño e Alfonso González, de Radio Pontevedra- Cadena Ser, viñeron falarnos da desinformación e das vías para acceder a información veraz, contrastada e de calidade.

Recursos para identificar informacións falsas

Se non sabes como facer procuras fiables na rede, empregar a busca inversa de imaxes para analizar a súa veracidade ou como funcionan as páxinas de fact-checking, podes botar man destas infografías:

24 de Outubro. Día das bibliotecas: "Contra a desinformación, bibliotecas"

Dende 1997 celébrase o Día das Bibliotecas o 24 de outubro,  unha conmemoración impulsada pola Asociación de Amigos del Libro Infantil y Juvenil á que se foron sumando, xa dende hai algún tempo, o Ministerio de Cultura e todas as administracións autonómicas.

O lema deste ano, "Contra a desinformación, bibliotecas", pretende destacar o papel fundamental que desempeñan todas as bibliotecas na loita contra a desinformación.

Desde a biblioteca do noso centro, levamos xa un tempo propoñendo actividades de alfabetización informacional, para que o alumnado saiba non so acceder á información da rede de forma crítica, senón tamén reelaborar esa información e reseñar as fontes en prol dos dereitos de autoría. Durante este curso, traballamos en 2º ESO co cómic "La invasión de las noticias falsas" de Elise Gravel (Editorial SM) e a partir da lectura, analizamos os intereses detrás dos bulos e realizamos infografías con consellos para identificar a información falsa. Aquí tedes algúns dos traballos realizados:

Infografía de Paio (2º ESO B)

Infografía de Maia (2º ESO B)

Infografía de Leo (2º ESO D)

Club de debate

Na mañá de hoxe, o alumnado do Club de Debate de 1 Bacharelato participou no Torneo organizado pola Facultade de Dirección e Xestión pública da UVigo, competindo co alumnado do Grao DXP, o Colexio Los Sauces e o IES República Oriental do Uruguay. 

Para iso, ocupamos o salón de plenos do Concello de Pontevedra para debatir sobre "Que é máis eficaz na xestión das emerxencias climáticas, as institucións públicas ou a acción social?". Foi unha xornada intensa que culminou moitas horas de traballo previo do noso equipo. Parabéns a Los Sauces pola súa merecida victoria e ao resto de equipos e ao noso alumnado polas súas brillantes intervencións!

Club de debate

O equipo que participará no VII Torneo de debate académico da Fundación Barrié o martes 4 de febreiro realizou un traballo intenso de investigación, redacción e ensaio dos seus discursos. Desde a biblioteca, agradecemos o seu esforzo e desexámoslles toda a sorte do mundo! 

Visita a Radio Pontevedra

O alumnado de 2 ESO tivo, na mañá de hoxe, o privilexio de escoitar a tres referentes da comunicación na nosa cidade: Alfonso González, Luz Espiño e Belén Hermida, de Radio Pontevedra, que compartiron con nós a experiencia da radio en directo, anécdotas persoais e consellos para que a comunicación mediante a palabra sexa efectiva. Grazas a todo o equipo de Radio Pontevedra pola acollida!

Proxecto competencial 4º ESO

O alumnado de Proxecto Competencial de 4º ESO recibiu o xoves 7 de novembro, na biblioteca do noso centro, a visita da xornalista da Voz de Galicia, Sara Carreira, que lles deu as claves tanto para facer unha boa reportaxe xornalística, como para diferenciar os bulos das noticias verdadeiras.

Esta actividade enmárcase dentro do concurso "Periodismo na escola", organizado polo xornal A Voz de Galicia, e no que o alumnado de 4º da materia de Proxecto Competencial vai participar elaborando unha reportaxe sobre o cancioneiro popular galego e a súa difusión entre os máis mozos/as (dirixido por Pilar López, profesora da materia). 

Club de debate 24/25

Se estás en 4 ESO ou bacharelato, e estás interesad@ no club de debate, acude á reunión informativa este mércores 9 de outubro ás 10.10 na aula de 1 ESO A.

Fin do Club de debate 23-24

Hoxe rematamos o proceso do Club de debate coa nosa intervención no Debate académico organizado pola Facultade de Dirección e Xestión pública da UVigo xunto ao alumnado do Grao de Xestión pública e do Colexio Los Sauces. 

Grazas a este proxecto, traballamos os ODS, investigamos, contrastamos información e, o mellor, aprendimos a traballar en equipo cun obxectivo común: argumentar que as tecnoloxías emerxentes non están reñidas coa sustentabilidade.

Parabéns aos 19 integrantes do grupo pola súa implicación e polo resultado. Un orgullo levarvos da man, desde a biblioteca, ata as intervencións que hoxe fixestes no Debate. Grazas tamén aos Departamentos de Lingua castelá e literatura e o Departamento de Xeografía e Historia pola súa colaboración.

 

Club de debate

Na tarde de hoxe xuntámonos para a preparación do debate sobre o ODS17 (tecnoloxías emerxentes e desenvolvemento sostible) que se celebrará na facultade de Dirección e Xestión o 8 de maio. Foi unha sesión ben produtiva!

Simulacro de Debate sobre os ODS

Dentro da actividade do Club de Debate organizado pola Universidade de Vigo e coordinado no noso IES pola Biblioteca, contamos hoxe coa presenza de Ignacio Nicolás Fernández, profesor na Facultade de Dirección e Xestión, que fixo con nós un simulacro de debate académico. Encantounos a experiencia e xa estamos preparados para empezar a traballar co tema de tecnoloxía e sustentabilidade, proposta para o debate que realizaremos en maio.

 

#SemanaglobalAMI. Traballos sobre desinformación.

A partir da proposta da biblioteca escolar en relación á #SemanaglobalAMI da UNESCO, o alumnado de segundo e cuarto de ESO traballou sobre algunas recomendacións que poden axudarnos a evitar a desinformación. Aquí están algunas das infografías máis acertadas realizadas polo alumnado:

Infografía de Ánxela M. (4ºESO C)

Infografía de Alicia R. (2º ESO C)

Infografía de Alicia O. (2º ESO B)

Infografía de Marta R. (2º ESO B)

Infografía de Mario C. (4º ESO C)

Infografía de Sofía C. (4º ESO D)

Traballo ALFIN: La fábrica de bulos de Maldita.es

A proposta de biblioteca, o alumnado de 4 ESO traballou no Scaperoom La fábrica de bulos, e case todos os grupos conseguiron o obxectivo a tempo! 

Se che apetece pasar un bo rato e probar se es quen de desenmascarar os bulos, pincha aquí.

#SemanaglobalAMI

                                                     

Co gallo da Semana global da Alfabetización Mediática e Informacional (AMI) proposta pola UNESCO (23 a 27 de outubro de 2023), desde a biblioteca estamos a traballar a detección de información falsa nos medios en 2 de ESO. Así, aproveitando os recursos ofrecidos pola biblioteca, o alumnado está a elaborar infografías con recomendacións e consellos para a análise da veracidade da información. Proximamente publicaremos os produtos realizados.

Alumnado de 4 ESO traballando sobre a fiabilidade das fontes

Se queres saber máis sobre a deinformación, pincha aquí.